20. Korrikaren ibilbidea ezagutarazi zuen AEK-k atzo, urtarrilak 9. Euskal Herri osotik pasako den euskararen aldeko herri-lasterketa erraldoia martxoaren 30ean hasiko da Otxandion, eta apirilaren 9an amaituko da, Iruñean.
Ohi bezala, aurreko Korrika amaitu zen herrialdean hasiko da aurtengoa, Bizkaian. Otxandio izan da irteera emateko AEK-k aukeratu duen herria, martxoaren 30eko arratsaldeko 17:00etan. Egun horretan bertan lehenengo hiriburura ailegatuko dira korrikalariak, Gasteizera, hain zuzen. Arabatik jarraitu eta Nafarroara pasatu, hortik iparralderantz abiatu eta apirilaren 2an Donibane-Garazi bigarren mugarriajoko dute, goizeko 11:00ak aldera. Gure eskualdetik egun honetan igaroko da korrika goizeko lehen orduetan Erronkari-Zaraitzutik etorrita.
Arratsaldeko 17:24ean Baionatik igaro; Lapurdi eta Nafarroa Beherea
zeharkatu eta Maule iragango du Korrikak, apirilaren 3ko 09:55ean. Nafarroa Behera eta Garaiatik arineketan pasatu ostean, iparralderantz abiatuko da berriro eta hilak 4an Donostiara helduko da, iluntzeko 18:45ean. Hurrengo egunetan, Gipuzkoa eta Bizkaiko kostaldea izango da nagusi, Bilbo hiriburu bizkaitarrera heldu arte ostegunean, hilak 6, 16:52ean. Lurralde guztietatik igaro ostean, Euskal Herriko lekukoak hegoaldea eskuz esku zeharkatuko du apirilaren 9ko goizean bere helmugara ailegatu arte: Iruñea. Mezuaren irakurketa eta amaiera jai handiaren hasiera goizeko 12:30erako aurreikusita
dago, Sarasate pasealekuan.
Korrikaren 20. edizioa izango da aurtengoa, “BatZuk” lelopean (“Bat egitera, zuk egitera, euskaraz”). Kilometroak erreserbatzeko aukera zabalduko da urtarrilaren 23an. Interesdunek Korrika bulegoekin harremanetan jartzea besterik ez dute, kilometro zehatza hartzeko eta diru ekarpena egiteko.
Hauexek dira telefonoak eta posta helbideak:
• ARABA 946 464 000 araba@korrika.eus
• BIZKAIA 946 464 000 bizkaia@korrika.eus
• GIPUZKOA: 946 464 000 gipuzkoa@korrika.eus
• IPARRALDEA: 05 59 25 76 09 iparraldea@korrika.eus
• NAFARROA: 946 464 000 nafarroa@korrika.eus
Korrikarekin batera guk ere euskara sustengatuko dugu! Animatu zaitezte!
Gure eskualdean Korrika batzordea antolatu da datorren urtarrilaren 20rako arratsaldeko 20:30 Garraldako Etxabarrengoan
